Мијалков и „Алфите“ ослободени за случајот „Тортура“ - апсењето на Љубе Бошковски

Во Кривичниот суд беше соопштена пресудата за поранешниот директор на УБК, Сашо Мијалков за случајот „Тортура“, кој се однесува на нечовечкото аспење на лидерот на Обединети за Македонија и поранешен министер за внатрешни работи, Љубе Бошковски, на 6 јуни 2011 година. Пресудата е ослободителна за Мијалков и припадниците на „Алфите“, а тоа значи дека според судот тие не се виновни за делото за кое се теретат.

Судењето за „Тортура“ почна во март 2018 година, а веќе еднаш почна одново, во октомври 2019 година, поради смена на поротник и изминати 90 дена од последното рочиште. Судот се осврна на самиот случај и постапувањето при апсењето на Бошковски.

Првообвинет во овој случај е поранешниот директор на УБК, Сашо Мијалков, кој во обвинението поднесено од поранешното СЈО, беше осомничен за кривично дело „мачење и друго сурово, нечовечко или понижувачко постапување и казнување“ од член 142 став 1 в.в. со член 23 од КЗ. За истото кривично дело беа осомничени и шест поранешни припадници на единицата „Алфа“ помеѓу кои, Ивица Анчевски, Новица Станковски, Петар Милошевски, Филип Атанасов, Јован Боцевски и Метуш Шабани.