Мицкоски му го образложил на Рикер законот што го предлага ВМРО-ДПМНЕ за обвинителството

Лидерот на ВМРО-ДПМНЕ, Христијан Мицкоски на денешната средба со вршителот на должност помошник државен секретар на САД за Европа и Евроазија, Филип Рикер, ги објаснил деталите и аспектите на законот за организирање на обвинителството што го предлага неговата партија.

Мицкоски, како што соопшти ВМРО-ДПМНЕ, укажал и на важноста од бескомпромисна борба против корупцијата и криминалот од секаков тип.

Теми на средбата биле и развојот на меѓусебните односи, актуелната политичка состојба и реформските процеси важни за државата.

– Мицкоски на средбата ја изрази својата загриженост поради лошата економска и политичка состојба и ја нагласи потребата за засилени реформи во процесот на исполнување на стратешките приоритети на Република Македонија, се вели во соопштението на ВМРО-ДПМНЕ.

Соговорниците ја истакнале важноста за развој на македонско-американското стратешко пријателство и поддршката на процесите важни за државата. Мицкоски ја потврдил заложбата на ВМРО-ДПМНЕ за заедничка соработка и развој на македонско-американските односи.

Претходно, по средбата со Мицкоски во седиштето на партијата, Рикер изјави дека од опозицијата очекува конструктивност за законот за јавно обвинителство.

– Имавме искрен и отворен разговор со лидерот на опозициската ВМРО-ДПМНЕ Мицкоски и со претставници на партијата во кој ги повторив истите пораки како и утрово. Се надевам на позитивен исчекор кога станува збор за владеењето на правото, СЈО и за Јавното обвинителство, бидејќи тоа е многу важно за европската перспектива на Северна Македонија, рече Рикер по едночасовната средба со Мицкоски.