Меѓународен саем во Солун со обраќање на Мицотакис и со низа протести

Со низа протести, меѓу кои еден и против Договорот од Преспа, со обраќање на грчкиот премиер Кирјакос Мицотакис и под силни безбедносни мерки денеска се отвора 84-то издание на Меѓународниот саем во Солун, jави дописничката на МИА од Атина.

Викендов, центарот на економските и политички случувања и вниманието на грчката јавност ќе биде насочено кон Солун, каде што премиерот на Грција, како и секоја година, со традиционалниот говор на отворањето ќе ги открие следните чекори и активности на неговата влада.

Паралелно со отворањето, исто така традиционално, како и секоја година, пред саемот ќе се одржат низа протести. Оваа година, до сега, закажани се најмалку шест собири.

Двата најголеми синдикати на вработените во приватниот и државниот сектор заедно ќе одржат синдикатот протест, синдикатот на Комунистичката партија ќе протестира посебно, а свои собири закажаа и левичарски здруженија, партии и организации, како и анархистички групи.

Одделен протест, преку социјалните мрежи организираат лица кои се против Договорот од Преспа.

За безбедноста ангажирани се над 3000 полицајци, а специјални единици во Солун пристигнаа од грчката престолнина.

Општина Солун, според грчката државна телевизија ЕРТ, ги отстранила кантите за отпадоци и контејнерите од улиците каде што е планирано да поминат демонстрантите, а Здружението на трговци побарало од сопствениците на продавници да преземат превентивни мерки.

На Меѓународниот саем под мотото „Претприемништво, иновации и екстровертност”, што ќе трае до 15 септември, ќе учествуваат 1600 изложувачи, бројка поголема во споредба со лани. Претставници ќе има од 18 земји, а Индија е почесна земја.

Грчкиот премиер, Кирјакос Мицотакис, кој од вчера е во Солун, денеска ќе одржи средба со претставниците на управниот одбор на саемот, веднаш потоа ќе ги посети штандовите, а во 20 часот по локално време ќе се обрати на свеченото отворање.