Матурантите кои препишуваа на испитот по мајчин јазик ќе полагаат пак во август

Новите построги правила за полагање не спречија препишување на матурскиот испит. Повторно излезе вибер група во која ученици меѓусебно си ги праќале одговорите на прашањата и есеите.

Матурантите кои на лице место биле фатени како препишуваат со телефони ќе треба пак да се пријават и да полагаат во август, оти нивниот испит ќе биде автоматски поништен.

Препишаните тестови, пак, на оние кои се договарале на вибер и не биле отстранети за време на испитот, ќе се откриваат потешко, односно при прегледувањето.

„Сега нашите оценувачи ќе добијат насоки дека треба да внимаваат на тоа и дека ако е споделен некој текст којшто е во вибер групите и ако тој текст го најдеме кај двајца ученици и двајцата ќе паднат. До минатата година добиваа 0 поени на текстот што значеше дека ако сите други прашања се решени, можеби да добијат двојка или тројка, сега ќе добијат единица, односно нема да го положат испитот“ – Билјана Михајловска, директорка на ДИЦ

Во групата именувана „Македонија“ имало околу 7 илјади членови и во неа се испраќани фотографии од прашањата, како и одговорите на испитот по мајчин јазик.

„Ако се членови на таа вибер група не можеме веднаш да кажеме дека тие 7 илјади лица препишувале. Некои ученици можеби влегле во групата пред месец дена, не знам кога е направена, но тоа не значи дека на денот на испитот имале телефон кај себе и дека гледале што се случува во вибер групата. Меѓудругото и не се сите ученици“ – Билјана Михајловска, директорка на ДИЦ

Вчера за првпат речиси 15 илјади ученици полагаа матура во ходници и спортски сали за да се избегне препишување. 

Вториот екстерен испит ќе се полага следната сабота. И годинава, најмногу пријавени кандатити има за англиски јазик. Лани, токму на овој испит беа фатени 3 илјади матуранти како препишуваат на истиот начин како и годинава – во голема вибер група.