Мартин Гоџоски од Варош го извади Светиот крст од осветените води на Охридското Езеро
Мартин Гоџоски од охридската населба Варош беше најуспешен и меѓу неколкуте стотини верници успеа да го извади Чесниот од осветените води на Охридското Езеро.
– Речиси десет години наназад скокам во езерото за да го фатам крстот. Голема желба ми беше да го фатам, еве тоа се исполна. Чувството е прекрасно, мислам дека тоа ќе ми донесе многу среќа и благососотојба во фамилијата. За да стигнеш до Чесниот крст мора да постиш, да си внесен во верата и да ги почитуваш правилата на Црквата, рече 25-годишниот Гоџоски.
Традиционално манифестацијата по повод православниот празник Богојавление – Водици во Охрид ја следеа илјадници верници и гости како од градот, така и од околните градови, но и пошироко.
Градоначалникот на Охрид, Кирил Пецаков, на среќниот фаќач и на сите православни верници им го честиташе празникот Богојавление – Водици.
– Традицијата на одбележувањето на денешниот празник во Охрид продолжува. И покрај проблемот со ковид-кризата смогнавме сили, ја организиравме оваа манифестација што ете мина во најдобар ред. За мене ова е најголемиот настан што се случува во Охрид. Она што како народ не држи тоа е традицијата, таа е тука да постои, ние да ја одржуваме и да се гордееме. На фаќачот на крстот му посакувам среќа, здравје и успех, рече Пецаков.
Прославувањето на Богојавление продолжува со забава на верниците на Градскиот плоштад и концертот на групата „Љубојна“.
Поради актуелната ситуација наметната од ковид-епидемијата, оваа година нема да се одржи никакво организирано одбележување на утрешниот празник Свети Јован Крстител односно Денот на рибарите, настан што во подобрите времиња привлекуваше голем број гости во градот, а години наназад се приготвуваше и рибна чорба во казан од неколку тони.
Инаку, празнувањето по повод верските празници Богојавление и Свети Јован Крстител во Охрид е една од најмасовните црковно-верски манифестации во овој дел од православието, како според бројот посетители на чинот на осветувањето на водите на Охридското Езеро, така и по бројот верници и гости кои влегуваат во студените езерски води за да го фатат Светиот крст.
Празникот Богојавление е поврзан со крштевањето на Исус Христос во водите на реката Јордан од Свети Јован, кој оттогаш се нарекува Крстител, а фаќањето на крстот означува соединување на човекот со Христа. Toj важи за еден од најголемите христијански празници. Со него завршуваат 12-те т.н. некрстени денови и циклусот зимски празници како Бадник, Божик, Нова Година (Василица) и други. На Богојавление на полноќ се верува дека се отвора небото, се појавува Бог, а луѓето му се обраќаат за да им ги исполни нивните желби. Во тој миг водите престануваат да течат и стануват лековити.
Ново на Сител
-
ЈСП Скопје: Можни се технички проблеми при валидирање со телефон или апликацијата „Скопска“
-
Ангелов: Би работел за СДСМ но за плата од 5000 евра
-
МЗШВ: Лозарите добиваат гарантирана откупна цена на винското грозје
-
Македонија и 11 членки на НАТО ја зајакнуваат соработката за обука на воени пилоти
-
ССМ на 2 април на протест поради одлуката на Врховниот суд, ќе протестира и на 1 мај
-
Полицајци спроведуваат политичка кампања, училиште претворено во штаб на ДУИ
-
Приведено уште едно лице за убиството на докторот во Железара
-
Вработените во здравството најавуваат протест на 8 април