Македонија убедлива против Украина

Убедлив триумф на постигна македонската кошаркарска репрезентација на турнирот во Охрид. 

 

Вечерва во СЦ „Билјанини извори“ нашата најдобра селекција ја декласираше репрезентацијата на Украина со 81-51. 

 

Нашиот тим доминираше на теренот од почетокот до крајот на дуелот. Избраниците на селекторот Марјан Србиновски со цврста одбрана и одличен напад од минута во минута го зголемуваа водството и на крајот стигнаа до +30 поени.

 

Кошаркарите на Украина само на стартот на натпреварот беа достоен ривал на црвено-жолтите.

 

Сигурната победа нашиот тим ја оствари без Дамјан Стојановски, кој синоќа против Израел го повреди скочниот зглоб. Во тимот го немаше и крилниот центар Јаневски, а на нивно место настапија Кирил Николовски и Владимир Брчков. 

 

Вечерва инаку најпрецизни беа Марко Србиновски и Војдан Стојановски со по 15 постигнати поени, Бојан Трајковски беше одличен во одбраната со дури шест украдени топки. 

 

Турнирот во Охрид завршува утре со дуелот меѓу Украина и Израел. 

 

Нашата селекција во рамките на подготовките за Евробаскетот , во вторник продолжува со одигрување на пријатеслки натпревар, во малата сала во СЦ „Јане Сандански“ во Скопје повторно ќе ги одмериме силите со Израел, а на 14 август во петок во Гевгелија ќе играме против Венецуела, потоа црвено-жолтите заминуваат на турнири во Литванија, Шпанија и Летонија. 

 

фото: www.basketball.org.mk