Мадуро: Можно враќање на преговорите со опозицијата

Претседателот на Венецуела Николас Мадуро изјави дека неговите претставници може да се вратат на преговорите со опозицијата, кои беа прекинати овој месец.

Мадуро во интервју објавено денеска за кинеската агенција Ксинхуа вели дека „добри вести“ можат да се слушнат во наредните денови  во врска со преговорите во кои посредува Норвешка.

Претседателот на Венецуела ги напушти преговорите со лидерот на опозицијата Хуан Гуаидо, поддржуван од САД, откако администрацијата на американскиот претседател Доналд Трамп воведе нов пакет економски санкции за Венецуела.

Мадуро рече дека неговите претставници се во контакт со опозицијата.

Економската и политичката криза во Венецуела принуди околу четири милиони луѓе да ја напуштат земјата последната година.