Љубојна го затвора Фестивалот „Илинденски денови“

Со концерт на групата Љубојна и македонски виртуоз на кларинет Исмаил Лумановски вечер во 21 часот, во театарот на античкиот локалитет Хераклеа ќе биде затворено 45. јубилејно издание на Републичкиот фестивал на народни песни и игри „Илинденски денови“.

Според востановената традиција, свеченото затворање ќе почне со доделување на наградите за најдобрите фолклорни групи и ансамбли кои во изминатите фестивалски денови понудија изворни, автентични и селектирани обработени фолклорни содржини инспирирани од изворните, а потоа во чест на наградените ќе биде приреден целовечерен концерт.

- Годинава фестивалот го затвораме со спектакуларен концерт на култната група Љубојна и светскиот познатиот македонски виртуоз на кларинет Исмаил Лумановски кои заедно со тајфата чалгии својот вечерашен концерт го насловија „Шербет Љубојна“. Тоа всушност е истоимен наслов на музичкиот албум и двојното ЦД кои наскоро ќе бидат промовирани, а издавач ќе биде нашата установа Центарот за култура-Битола, истакна директорот Борче Димитровски во пресрет на вечерашната финална вечер.

Во изминатите четири денови на фестивалот во Битола продефилираа околу 1.000 учесници, членови на КУД од државата, ансамблот „Македонка“ од Торонто, Канада и гости од Полска, Романија, Италија, Хрватска и Србија, кои синоќа на плоштадот „Магнолија“ приредија незаборавна интернационална вечер. Во рамки на фестивалот се одржаа повеќе придружни манифестации, работилница и изложба по повод јубилејот 40 години Државна изложба на детски ликовни творби на тема „Народната култура како трајна инспирација во моето творештво“.

Републичкиот фестивал на народни песни и игри „Илинденски денови“ се одржува под покровителство на Собрание на Република Македонија.