Лицата со епилепсија се дискриминирани во општеството и имаат проблеми со набавката на лекови

Дискриминација, немање можност за вработување и немање на лекови на позитивната листа кои се неопходни за живот. Ова се само дел од огромниот број на проблеми со кои се соочуваат околу 25.000 лица со епилепсија во Македонија. Во Општина Прилеп нивниот број се движи околу 3.000. Од здружението „Епилепсија Македонија“ од овој град кои постојат 6 години велат дека свеста кај граѓаните за оваа болест била многу ниска. Голем дел од овие лица исто така живеат доста сиромашно.

„Лицата со епилепсија имаат потешкотии да најдат вработување во нашата држава, исто така работодавачите се плашат да ги вработат нив поради тоа што ги сметаат како лица со инвалидитет и што е уште поголем проблем општетсвото не е доволно запознаено со тоа што е епилепсија“, рече Илија Биноски, волонтер во здружение „Епилепсија Македонија“.

Друг проблем со кој се соочуваат се лековите кои се доста скапи а ги нема на позитивна листа. Бараат државата итно да ги сослушна нивните барања.

„Одредени лица кои што ја имаат оваа невролошка нарушеност можат да ги снабдат од странство, но голем дел исто така се соочуваат со тој проблем што не можат да си ги дозволат бидејќи се многу скапи. Затоа сакаме да го потенцираме овој проблем и да упатиме еден апел до државата и Министерството за здравство да помогне при снабдување со овие лекови“, истакна Симона Апостолоска, волонтер во здружение „Епилепсија Македонија“.

Денеска во Прилеп се одбележа Светскиот ден за поддршка на на лицата со епилепсија. Тој е основан во 2008 година, а уште се вика и Виолетов ден бидејќи виолетовата боја е боја на епилепсијата и боја која се поврзува со чувството на осаменост.