Кривични пријави за двајцата малолетници за случајот со силување 12-годишно девојче од Охрид

Полицијата поднесе пријава до Основното јавно обвинителство во Охрид против малолетниците инволвирани со случајот на извршена обљуба врз малолетничка од Охрид.

Според полициското соопштение, по спроведените службени разговори СВР – Охрид до ОЈО доставил известување за постоење основани сомненија дека 16-годишниот малолетник е сторител на кривично дело „полов напад и силување“, како и за сторено дело „уцена“ од страна на 14-годишник од Охрид.

Полицијата вчера во Охрид го приведе првопријавениот, кому од надлежен судија му е одредена мерка притвор во траење од 30 дена.

Според првичните информации, тој на 12 овој месец извршил обљуба врз 12-годишно девојче од Охрид, додека друг малолетник го снимал чинот.

Второпријавениот во случајот пак откако го добил снименото видео, на 20 ноември ја уценувал малолетничката со инсистирање на сексуален однос,заканувајќи и се дека доколку одбие ќе го објави видеото.

Врз малолетничката во текот на вчерашниот ден е извршен медицински преглед, а со сите инволвирани лица во случајот се спроведени истражни разговори во присуство на родител и претставници Центарот за социјални работи од Охрид.