Кристијано Роналдо „изброја“ 100 голови во евро купови

Фудбалерот на Реал Мадрид, Кристијано Роналдо синоќа постигна два гола вредни победа над Баерн Минхен (2:1) и стана првиот играч со постигнати 100 погодоци во Лигата на шампионите и Лига Европа.

 

Португалецот најпрво во 47. минута на средбата во Минхен го постигна 99-от гол во евро-куповите, а 30 минути подоцна стигна и до 100. Од овие 100 гола Роналдо 84 ги постигнал во дресот на Реал Мадрид, а 16 настапувајќи за Манчестер Јунајтед.

 

 - Среќен сум поради овој рекорд и сакав да го остварам. Голема чест е тоа што го постигнав против Баерн, изјави Роналдо по триумфот на „Алијанц Арена“.

 

Најблиску до Роналдо по бројот на постигнати голови на евро-сцената е неговиот голем ривал Лионел Меси кој досега 97 пати се запишал во листата на стрелците.