Косово: Еден новозаразен, 87 излекувани, 340 активни случаи на Ковид-19

Институтот за јавно здравство на Косово (ИШПК) објави вечерва дека во текот на денешниот ден во земјата се извршени тестирања на 220 лица кои биле во контакт со заболени од Ковид-19, при што само еден од нив резултира позитивен на новиот коронавирус, јави дописникот на МИА од Приштина.

Вкупната бројка на заразени од појавата на пандемијата во Косово, вклучително денешниот случај, достигна до 856. Новозаболениот е од јужна Митровица и е случај на контакт со веќе потврден носител на вирусот.

Денеска, според соопштението на ИШПК, е забележан и рекорден број на лица, вкупно 87, кои се излекувани од заразата. Во целата држава, согласно пропишаните методи на Светската здравствена организација, вклучително денешните случаи, официјално како излекувани се водат 490 лица.

Бројката на починати од заразата, останува и натаму 26, при што последниот случај е евидентиран во неделата во Зубин Поток во Северно Косово. Косовките здравствени власти нагласуваат дека сите жртви на заразата страдале и од други хронични болести.

Според овие официјални податоци, во Косово моментално се активни 340 активни случаи на заразени од новиот вирус.

Бројот на извршени тестирања во Лабораторијата за молекуларна микробилогија на ИШПК, вклучително денешните 220, изнесува 8.761.