Концерти на гитаристот Дарко Багески во Стокхолм и Малме

Гитаристот Дарко Багески ќе одржи солистички концерт на 29 септември во Стокхолм, кој е организиран од Амбасадата на Република Македонија во Шведска. Концертот е хуманитарен и средствата ќе бидат донирани за населението во Скопско погодено од поплавите по невремето на 6 август. 

На концертната програма се дела од Џулијани,  Бариос, Мерц, Јовичиќ, Мирослав Тадиќ, Реис. 

Наредниот ден, 30 септември, Багески ќе одржи солистички концерт и во Малме, со поддршка на Министерството за култура на Република Македонија.

Дарко Багески (1981) е вонреден професор по гитара на Факултетот за музичка уметност во Скопје, одржува мастеркласи на меѓународни фестивали и натпревари и често е член во жиријата.

Музичкото образование го почнал во Скопје, матурирал во Средно музичко училиште во Загреб, а дипломирал на Високата школа за музика „Франц Лист“ во Вајмар, Германија. Магистрирал на Државниот конзерваториум за музика во Солун. Се едуцирал кај еминентни професори по класична гитара, како: Џевдет Сахатџија, Герхард Рајхенбах, Јурген Рост, Костас Коциолис...

Имал голем број солистички концерти во Македонија, Хрватска, Србија, Германија, Грција, САД, Шведска..., настапувајќи како солист со камерни оркестри и со Македонската филхармонија.