Концерт на „Херувими“ за 110-годишнината од обновата на храмот „Св. Никола“ во Крушево

Во храмот „Св. Никола“ во Крушево вечер концерт ќе одржи камерниот хор „Херувими“. Концертот се одржува по повод 110-годишнината од возобновувањето на овој храм.

Промотор на концертот ќе биде Кочо Топузовски, а на програмата ќе бидат изведени црковни творби од византиската традиција од: Јоан Хармосин – Охридски, Јаков Протопсалт, Андон Шахпаски, Манасиј поп Тодоров и Јане Коџабашија. Концертот се одржува во организација на Арт – Кул Крушево, Центарот за византолошки студии и Универзитетот „Евро Балкан“ – Скопје, а со поддршка на Министерството за култура и Новиот културен бран.

Камерниот хор „Херувими“ е ансамбл кој негува и изведува црковни творби од византиската традиција од македонски автори. Настапувал на повеќе домашни и меѓународни манифестации.

„Херувими“ настапува во состав од професионални музичари Мирјана Павловска-Шулајковска, Катерина Ќетковиќ-Фидановска, Лиле Анастасова, Ружица Коџабашија, Златица Жантевска-Пејиќ, Весна Малјановска, Станислава Поцевска и Јане Коџабашија.

Храмот „Свети Никола“ во 1907 година е обновен врз темелите на претходниот храм посветен на истиот светец, заштитникот на Крушево, кој до темел е разурнат од отоманската војска, ноќта на 12 спроти 13 август 1903 година при падот на Крушевската Република.