Колумбија денеска ќе потпише мировен договор со ФАРК

Колумбиската Влада и групата Револуционерни вооружени сили на Колумбија (ФАРК) денеска во Богота ќе потпишат нов мировен договор, со кој се става крај на вооружениот конфликт, кој трае повеќе од половина век. 

- Делегациите на Владата на Колумбија и на ФАРК прифатија на 24 ноември во 11:00 часот (16 според Гринич) во Богота да потпишат договор за ставање крај на конфликтот и постигнување одржлив мир, соопштија во заедничката изјава преговарачите од двете страни .

Тие нагласија дека потоа новиот договор ќе биде претставен пред колумбискиот Парламент, со цел да биде одобрен. 

Претходниот договор со ФАРК на референдум беше отфрлен од страна на Колумбијците . 

Поранешниот колумбиски претседател Алваро Урибе одби да го поддржи новиот договор.

Урибе ја предводеше кампањата за поништување на претходниот договор, која доведе до негово отфрлање. 

Според Урибе над 50-те промени во договорот ќе ја стават под закана демократијата во Колумбија, бидејќи со нив не се казнуваат доволно бунтовниците за злосторствата кои ги извршиле.