Коѕијас: Проблемите со Скопје може да се решат со смелост

Разликите со Скопје можат да се решат со смелост, вели министерот за надворешни работи на Грција, Никос Коѕијас во интервју за германскиот весник „Шпигел“.

- Разликите со Скопје се проблеми со историски карактер, со идентитет, со наследство и култура. Овие прашања се чувствителни. Но, можат да се решат со смелост, како што правиме сега. Додека, пак, со Турција имаме проблеми со геостратешки и геополитички претензии, вели шефот на грчката дипломатија во интервјуто за германскиот весник.

Речиси целото интервју на Коѕијас за „Шпигел“ е посветено на грчко - турските релации, јави дописничката на МИА од Атина.

Во однос на двајцата грчки војници уапсени на 2 март од турските власти, откако поради лошото време по грешка преминале на турска територија во близина на Еврос, а сѐ уште се во затвор во градот Одрин, Турција, Коѕијас вели дека во неговата канцеларија има документи за стотици слични случаи со војници за кои постоело враќање без „таква ескалација“.

- По прв пат еден инцидент, кога некои војници поминаа 10 метри од границата, се третира како обид да се развие во криза, додека пак во слични случаи, со децении имаше размени, вели министерот за надворешни работи на Грција.

Тој додава дека однесувањето на Турција е променето, а тоа не е добро, бидејќи, „и нивни војници ќе се изгубат, како што секогаш се случуваше од време на време, а второ затоа што ова не е однесување на сојузник во НАТО“.

Шефот на грчката дипломатија објаснува дека случајот со осумтемина турски војници е различен од случајот со двајцата грчки војници, бидејќи турските побараа азил во Грција, а грчките власти не ги уапсија, додека пак војниците од Грција не побараа азил во Турција и беа уапсени не по нивна волја.