Свет
29. July 2019 - 15:23

Кина ги осуди протестите во Хонг Конг: „Му нанесуваат штета на владеењето на правото“

„Овие грозни инциденти тешко му наштетија на владеењето на правото, на јавниот поредок, стопанството и животот на луѓето во Хонг Конг“, рече порпаролот на Уредот за работите во Хонг Конг и Макао во Пекинг, највисоката власт во оваа поранешна британска колонија.

Тој ги повика „луѓето од сите општествени слоеви едноставно да проговорат и станат против насилството“, и притоа обвини „мал број лица“ за нарушување на вредностите на регионот.

-Ниту една цивилизирана заедница нема да дозволи толку насилство, додаде тој. 

Според пишувањето на „Саут Чајна Морнинг Пост“, ова е прва прес конференција што овој Уред ја оддржува од 1997 година и доаѓа по неколкуте недели протести против предложениот закон за екстрадиција на осомничените з акриминал во Кина.

Иако законот, што ги предизвика немирите во јуни, е одложен на неопределено време, стотици илјади демонстранти продолжуваат да го изразуваат своето незадоволство во финансискиот центар на градот, и, како што велат, против употребата на прекумерна полициска сила.

Полицајците вчера испукуваа гумени куршуми и солзавец во обидите да ги протераат демонстрантите од владиниот и деловен кварт на Хонг Конг.

Тензиите ескалираа минатиот викенд која група мажи, облечени во бели маици, за кои се верува дека се членови на тријадата или локалната мафија, нападнаа демонстранти на железничка станица.