Кери: Русија треба да се воздржува од офанзивни операции и да го убеди Асад да го стори истото

САД и натаму сметаат дека Русија треба да се воздржува од офанзивни операции и да ја убеди сириската Влада да го стори истото, изјави американскиот државен секретар Џон Кери.

- Русија треба да го зајакне притисокот врз режимот на сирискиот претседател Башар ал Асад за да го увери во неопходноста од зачувување на примирјето и создавање услови за обновување на преговорите со сириската опозиција во Женева, изјави Кери на заедничката пресконференција по средбата со колумбискиот министер за надворешни работи Марија Анхела Олгин.

Кери нагласи дека преговорите во Женева биле прекинати, бидејќи претставниците на умерената опозиција не можеле да ги водат во услови на континуирани напади на владините сили врз нивните формации.

- Исклучително е важно Русија да се воздржува од водење на офанзивни операции и да го убеди режимот на Асад да го стори истото, а ние од своја страна имаме одговорност да ја натераме опозицијата да не спроведува такви операции, рече американскиот државен секретар.

Според него неопходно е сите страни да ги почитуваат условите од резолуциите на Советот за безбедност на ОН за решавање на сирискиот конфликт.

- Но тоа што моментално се случува во Сирија е причина за сериозна загриженост, рече Кери.