Катар: Генералниот секретар на ОН го отвори состанокот на високо ниво посветен на Авганистан

Во катарската престолнина Доха, под претседателство на генералниот секретар на ОН, Антонио Гутереш, вчера започна дводневната средба на специјалните претставници за Авганистан од различни земји, јави ДПА, повикувајќи се на портпарол на Светската организација.

Според ОН, целта на средбата е да се разговара за пристапот кон растечкото меѓународно присуство во Авганистан.

Талибанската влада во Кабул одби да учествува на состанокот, тврдејќи дека нејзините услови не се исполнети.

Талибанците сакаат да бидат признати „како единствени официјални претставници на Авганистан“ и да разговараат со ОН за „сите прашања на многу високо ниво“.

На состанокот се очекува да присуствуваат и авганистански жени и претставници на граѓанското општество.

Организациите за човекови права ги повикаа ОН да се погрижат правата на жените да бидат во центарот на сите дискусии.

Во декември, Советот за безбедност на ОН донесе резолуција со која се бара од генералниот секретар на ОН да назначи специјален пратеник за Авганистан.

Талибанците се противат на можното именување на таков пратеник, тврдејќи дека тоа не е неопходно кога веќе постои дипломатска мисија на ОН во Кабул.

Неодамна, специјалниот координатор на ОН, Феридун Синирлиоглу, препорача во извештајот да се подготви патоказ за реинтеграција на Авганистан во меѓународниот економски и политички систем, под услов Талибанците да ги исполнат меѓународните обврски на Авганистан.

По враќањето на власт во 2021 година, талибанците ги отфрлија повиците за „инклузивна влада“ и за гарантирање на правата на жените на образование и работа.

Како резултат на тоа, ниту една земја не ја призна нивната влада. Банкарските резерви на земјата се замрзнати на Запад, а високорангирани талибанци се на листата на барани од САД.