Карбинци ќе го развива турзимот во викенд населбата Вртешка

Општина Карбинци доби 450.000 евра од Светска банка, за подобрување на инфраструктурата, но и понудата во викенд населбата Вртешка.

Градоначалникот на Општина Карбинци, Јордан Насев вели дека првата фаза почнува со асфалтирање на пристапниот пат.

-Петте подпроекти се однесуваат на изградба на околу еден километар пристапен пат до село Вртешка и планинарски дом во вредност од 8.500.000 денари, потоа мапирање на планинарски патеки, вкупно 14 во износ од еден милион денари, реконструкција и адаптација на кровната конструкција на планинарскиот дом Вртешка, изградба на вештачка карпа за искачување и за сето ова да биде во функционална состојба е набавена и една универзална машина ровокопач, вели Насев.

Планирано е реализацијата на овој голем проект за развој на планинскиот туризам во општината да трае четири месеци, а веќе е и избрана и фирма што ќе ги изведува градежните работи.

– Со овој проект се поддржуваат клучни инвестиции, што придонесуваат одредени дестинации да станат попривлечни за туристите, нудејќи и поатрактивни туристички производи, вели Насев.

Со реализацијата на проектов за викенд населбата Вртешка, што се наоѓа на планината Плачковица ќе биде подостапна за туристите, велосипедистите и секако планинарите.