Карбинци и Чешиново-Облешево се поврзуваат со локален пат

Во општина Карбинци од денеска почна изградбата на локалниот пат од селото Аргулица до селото Борилчево во општина Чешиново-Облешево. Патот во должина од три и пол километри, како што вели градоначалникот на општина Карбинци Зоран Минов, го градат екипите на ЈП „Македонија пат“.

- Благодарение на Владата на Република Македонија и на Агенцијата за државни патишта од денеска почнуваме да го градиме овој пат и да го асфалтираме. Вредноста на овој пат е 16 милиони денари и во најбрз можен рок ќе биде изграден. Овој патен правец е од големо значење за нашата општина, затоа што луѓето што гравитираат кон општините Чешиново-Облешево и Кочани скратуваат повеќе од 25 километри, изјави Минов.

Нагласи дека изградбата на патот од селото Аргулица до селото Борилчево е еден од приоритетните проекти на општината, а неговата изградба ја бараа жителите и фирмите, кои имаат производствени капацитети и оранжерии во општината. Овој патен правец ќе им овозможи на земјоделците побрзо и побезбедно да пристигнуваат до своите ниви, а исто така ќе се користи и како алтернативна делница доколку е запрен сообраќајот на магистралниот пат Штип-Кочани.