ЈП „Чистота и зеленило“ воведе телефонска линија за пријавување поплаки во работењето

Јавното претпријатие „Чистота и зеленило“ воведе телефонска линија на која кумановци и правните субјекти ќе можат да пријават пропусти во работењето на комуналното претпријатие, соопштија денеска надлежните. Граѓаните можат да пријават на телефонскиот број 072/314-502 и да ги информираат тимовите за какви било итни интервенции, дополнителни потреби и услуги кои ги нуди претпријатието во редовното работење.

-Ние како ЈП сме надлежни за чистење на јавно прометните површини, уредување на зелени површини и изнесување на комунален смет од домаќинства и правни лица. Но, се случува поради објективни причини, дефекти на камионите да не сме во можност во целост, на дневно ниво да го исполниме динамичниот план. Граѓаните имаат поплаки дека во одреден ден не е изнесен сметот, бараат да се изнесе и градежен шут, трева гранки и друг вид некомунален смет за кој ние не сме надлежни, изјави директорот на претпријатието Даниел Стојчевски.

Затоа, појасни, воведена е оваа телефонска линија на која граѓаните и правните лица ќе добијат информации како одредени проблеми можат да се надаминат. За да се изнесе градежен шут и друг некомунален отпад, претпријатието праќа друго возило, а не камионите кои можат да се расипат при скалдирање на некомунален смет и за таа намена заинтересираните за еден кубик треба да платат 1.800 денари.

ЈП „Чистота и зеленило“ располага со 15 камиони, а од претпријатието најавуваат дека работат да обезбедат дополнителна механизација за изнесување на комуналниот смет. Дневно се изнесуваат од 120 до 140 тони смет.