Јовиќ: Спортинг е фаворит во сабота

Ракометарите на Металург по двата пораза во првите две кола од Лигата на шампионите ги очекува нов тежок натпревар. Во сабота во Скопје ќе гостува португалскиот првак Спортинг, екипа која има една победа во групата.

- За дуелот со Спортинг можам да кажам дека тие се фаворити. Тоа е искусен тим, со цврста одбрана и добра транзиција. Сите обврски се исполнети и сметам дека не е дозволено да играме како во дуелот со Бешикташ. Затоа мора и да се трансформираме од „мачиња во лавови“, изјави заменик тренерот на Металург Александар Јовиќ, кој во отсуство на Лино Червар беше на прес конференцијата.

Голманот Дарко Арсиќ, кој имаше слаб ден на дуелот со Бешикташ изјави:

- Ракометот е колективна игра. Ја преземам одговорноста за слабиот настап на дуелот со Бешикташ, екипата немаше помош од мене. Ниту еден ривал не е јак, ако ние му дозволиме да игра. Во сабота ќе дадеме се од себе и ние ќе бидеме тие што ќе ја постигнат победата.

Дуелот Металург - Спортинг се игра во сабота во СЦ „Борис Трајковски“ со почеток во 17:30 часот.