Свет
29. January 2016 - 9:26

Јапонските власти со наредба за уништување на каква било ракета од Северна Кореја

Јапонските власти издадоа наредба армијата да биде подготвена да уништи каква било ракета испукана од Северна Кореја, а која би била закана за државата, објавија локални медиуми во момент кога расте загриженоста дека Пјонгјанг подготвува тест со ракета со голем дострел.

Наредбата е издадена од министерот за одбрана Ген Накатани, тврди јапонскиот весник Никеј дејли и агенцијата Кјодо.

– Ги преземаме сите мерки за да одговориме на лансирање на ракета, собирајќи информации и координирајќи се со релевантни држави, изјави портпаролка на Минстерството за одбрана.

Западни медиуми јавија за сомнителни активности во главниот воен комплекс на Северна Кореја со што поттикнаа спекулации дека Пјонгјанг може да лансира ракета веќе идната недела.