Јаневски: Имаме тежок противник, двата тима сакаат први бодови

Фудбалската експедиција на Вардар од денеска е во Норвешка, каде утре „црвено-црните“ го играат дуелот од 2.коло од Лига Европа со шампионот на Норвешка, Розенборг.

На прес конференцијата одржана пред тренингот на Вардар, тренерот Чедомир Јаневски за утрешниот дуел истакна:

- Имаме респект за нашиот ривал, кој е со големо искуство. Дојдовме тука да одиграме добар натпревар и се надевам на позитивен резултат. И двата тима имавме лош старт во првото коло загубивме убедливо и затоа ги посакуваме првите бодови.

 

Заменик капитенот Никола Глигоров ја потенцираше силата на утрешниот ривал:

- Знаеме против кој ривал ќе играме. Розеборг добро го имаме анализирано. Имаат добри и искусни играчи, а тука најпознат е Бендтнер. Тој има искуство од настапи во силните лиги и во репрезентацијата. Екипата на Розенборг го елиминираше и Ајакс. Имаме желба за позитивен резултат и се надевам дека утре тоа и ќе го постигнеме.

Натпреварот Розенборг - Вардар се игра на „Леркендал“ Арена со почеток во 19 часот. Во истиот термин се игра и вториот дуел од групата Зенит - Реал Сосиедад.