Македонија
13. September 2016 - 11:04

Иванов се сретна со поранешниот словачки претседател Шустер

Македонскиот претседател Ѓорге Иванов денеска го прими поранешен претседател на Словачката Република, Рудолф Шустер.

Иванов, како што  соопшти неговиот Кабинет, му честитал  на Шустер за доделениот почесен докторат на Универзитетот „Св. Климент Охридски” во Битола.

Двајцата соговорници размениле мислења за севкупните билатерални односи, констатирајќи дека двете земји градат добри односи кои се базираат на меѓусебно разбирање и пријателство, континуиран политички дијалог, партнерска соработка во голем број области и длабоки културни врски.

Македонскиот претседател изразил очекување за продолжување на позитивната динамика во соработката и натамошно интензивирање на билатералниот политички дијалог на сите нивоа.

Во контекст на аспирациите на Република Македонија за членство во Европската унија и во НАТО, претседателот Иванов изразил очекување дека Словачка, како актуелен претседавач со Советот на ЕУ, ќе даде силна поддршка за неодложен почеток на пристапните преговори.

На средбата било изразено задоволство од позитивниот развој на економските односи меѓу двете земји и континуираниот раст во трговската размена.

Во однос на соработката во областа на културата и реализираните бројни заеднички активности, двајцата соговорници изразиле очекување за нејзино натамошно продлабочување.