Италија во Скопје без Монтоливо и Пеле

 

Без Рикардо Монтоливо и Грацијано Пеле, фудбалската репрезентација на Италија ќе допатува во Скопје, на квалификацискиот натпревар за Светското првенство 2018 година против Македонија. 

 

Имено, капитен на Милан, Рикардо Монтоливо, поради повреда на коленото која ја здоби на синоќешниот натпревар со Шпанија, нема да настапи против Македонија. На негово место, селекторот на „аѕурите“, Џампјеро Вентура, реши да го повика 22-годишниот фудбалер на Торино, Марко Бенаси.

 

Покрај Монтоливо, во Скопје нема да допатува и Грацијано Пеле, кој имаше караница со селекторот Вентура и е отстранет од националниот тим. Пеле веќе го напуштил таборот на „аѕурите“, но дали селекторот Вентура ќе повика нов играч на негово место останува да се види. 

 

Вентура не даде никаков коментар за евентуално повикување на Марио Балотели, за средбата со Македонија која ќе се игра во недела на арената „филип Втори“ со почеток од 20 часот и 45 минути.