Ирец доброволец во Украина: Тоа е геноцид, мртви Руси и Украинци насекаде, доста ми е се враќам дома | ВИДЕО

Скај њуз интервјуираше двајца странски доброволци кои се бореле во украинската армија во изминатите 17 месеци. Нивните изјави беа поткрепени со дополнителни сведоштва на уште неколку странски волонтери. Рис Бирн, со кодно име Рамбо, е 28-годишник од Даблин. 

Тој се борел за бројни единици во Украина, вклучително и 59-та бригада на украинската територијална армија каде управувал со тежок митралез. Вели дека битката за враќање на територијата била страшна.

„На ‘нултата линија’ тоа е ужас. Тоа е ужас. Има само геноцид. Тоа е колење“, рече тој.

„Има мртви луѓе насекаде. Мртви Руси. Мртви Украинци… Најголемиот проблем со кој се соочуваме кога влегуваме во рововите е да ги прегазиме сите мртви тела што се веќе таму – тие работи навистина ве прогонуваат“, додаде тој.

Тој го даде интервјуто од Центарот за одмор во источна Украина, засолниште што го користат воените волонтери кога ќе добијат одмор од фронтот.

Ирецот ја опиша својата средба со руски тенк и руски војници кои за малку ќе го убиле.

„Ни рекоа дека има руска линија на ровови и наша работа беше да влеземе во рововите и да ги расчистиме. Потоа требаше да ги држиме додека не дојде засилувањето и потоа да се вратиме назад“, објасни тој.

Тврди дека единица со 40 членови, меѓу кои Украинци, Американци и Британци, била однесена во област во близина на нултата линија. Сепак, Бирн се жали дека немале противвоздушна одбрана или беспилотни летала, а неколку украински тенкови се повлекле. Друг тенк им се приближил во далечина и членовите на единицата претпоставувале дека е пријателски. Војниците велат дека понекогаш е тешко да се разликуваат украинските од руските возила.

Одеднаш руски тенк почна да ја гаѓа нивната позиција. Оние кои преживеале се засолниле во шумата. Има и снимка на која се гледа како припадник на единицата со радио бара помош додека тенковски гранати паѓаат во близина. Среде хаосот, спасот се појави во форма на украински камионет, кој во областа го донел војник кој барал исчезнат сателитски приемник.

Почнале да се повлекуваат, но Русите повторно ги забележале. Бирн раскажува како непријателскиот тенк повторно почнал да ги лови.

„Сега имаме тенк кој буквално излегува, почнува да не лови. И страшно е кога ќе видите голем Т-72 кој доаѓа по вас, а вие сте во Хамви. Да, тоа е како врел нож низ путер. Па повторно, сите ние викаме: „Вози, вози“. Паднав“, се сеќава тој.

До него седел неговиот пријател, дански борец со прекар Полар. Тој рече дека гледал руска граната како лета над нивните глави. „Не треба да бидеме живи“, рече тој.

На Бирн и неговиот пријател Полар им е доста од војна. По 17 месеци на места како Бахмут, тие решија да се упатат дома.