Иранските власти уништија сто илјади сателитски антени

Иранските власти уништија сто илјади сателитски антени и друга опрема за сателитско емитување, јавија локалните медиуми.

- Целата опрема доброволно е предадена од граѓаните, соопшти агенцијата basijnews.ir, орган на милицијата басиџи, паравоена формација на влијателната Исламска револуционерна гарда. 

- Еден милион лица учествуваа во таа програма, изјави раководителот на басиџи, генерал Мохамед Реза Нагди на прес-конференција пред уништувањето на уредите на официјална церемонија во Техеран. 

Според него сателитските телевизии, кои во целина ја развиваат корупцијата и ја уништуваат културата, доведуваат до повеќе разводи, поголемо користење дрога и намалување на безбедноста. 

Иако масовно е непочитуван, во Иран со закон се забранува поседување сателитска антена, при што казната може да биде од 30 до 2.800 долари. Според некои проценки, 70 отсто од 80-те милиони жители на Иран, не го почитуваат законот.