Свет
10. December 2017 - 12:07

Илјадници Индонезијци повторно протестираат против одлуката на Трамп за Ерусалим

Околу 10.000 Индонезијци се собраа на протестен митинг пред амбасадата на САД во Џакарта во поддршка на Палестинците и осудувајќи ја одлуката на претседателот Доналд Трамп да го признае Ерусалим за главен град на Израел.

Демонстрантите носеа транспаренти со натписи „Амбасада на САД, оди си од Ал Кудс", „Ослободете ги Ерусалим и Палестинците", „Ние сме со Палестинците" и „Палестина е во нашите срца". Ал-Кудс е арапското име на Ерусалим.

Денешниот протест, организиран од исламистичката Партија на правдата и просперитетот, е вториот откако Трамп ја објави одлуката во средата.

Претседателот Џоко Виду остро го осуди овој чекор на Трамп, кој беше опишан како прекршување на резолуциите на ОН.

Индонезија, како земја со најголемо муслиманско население во светот, одамна силно ги поддржува Палестинците и нема дипломатски односи со еврејската држава.