ИГИНП ќе соработува со институтите за национална историја и за наследство на Албанците и Фондот за холокаустот

Институтот за геостратешки истражувања и надворешна политика (ИГИНП) при Министерството за надворешни работи денеска потпиша меморандуми за соработка со Фондот на холокаустот на Евреите од Македонија (ФХЕМ), Институтот за национална историја (ИНИ) и Институтот за духовно и културно наследство на Албанците (ИДКНА). 

Потпишувањето на Меморандумот меѓу ИГИНП и ФХЕМ подразбира соработки во истражувањата и останати активности кои се однесуваат на холокаустот и борбата против антисемитизмот, дискриминацијата, расизмот и ксенофобијата, соопшти МНР.

Потпишувањето на Меморандумот меѓу ИГИНП, ИКДНА и ИНИ ќе придонесе кон развивање и обезбедување на тесна меѓусебна соработка во сегментот на општествена, историска, културна и друг вид соработка од значење за Република Македонија.

Соработката, според соопштението, ќе се одвива преку размена на информации, искуства и знаења, користење на стручните капацитети во насока на развивање научно - истражувачки активности, заедничко планирање, подготовка и организирање на конференции, дебати, трибини, тркалезни маси, семинари, работилници, како и друг вид на активности во функција на изготвување соодветни препораки и други документи за прашања од општествено, историско и културно значење за Република Македонија.

МНР во соопштението најавува дека во текот на оваа година се планира заедничка организација на две меѓународни конференции.