„Христијанските мотиви во современата македонска ликовна уметност“

Изложбата „Христијанските мотиви во современата македонска ликовна уметност“ денеска ќе биде отворена во објектот Чифте амам на Националната галерија на Македонија. Автор на изложбата е Златко Теодосиевски, виш кустос во Националната галерија.

На изложбата ќе бидат претставени 50-тина дела од 25 македонски уметници од сите генерации, почнувајќи од Димитар Андонов Папрадишки, Ѓорѓи Зографски, Димо Тодоровски, Никола Мартиновски, Димитар Кондовски, Владимир Георгиевски, Глигор Чемерски, Благоја Николовски, Данчо Кал'чев и Ванчо Јаков. Од авторите од помладите генерации застапени се делата на Атанас Ботев, Златко Глигоров, Велимир Жерновски, Душица Стефановска...

Изложбата ретроспективно го елаборира присуството на религиозни, односно христијански теми/мотиви во современата македонска ликовна уметност од почетоците на 20 век, од периодот на појавата на граѓанското сликарство до денес. Изложбата се темели на фактот дека повеќе од два милениуми христијанството е доминантната сила што ги обликува (не само) европската култура и уметност и македонската визуелна уметност не е исклучок во овој поглед.