Гутереш: Секој неселективен напад врз цивилни и медиумски структури го крши меѓународното право

 Генералниот секретар на ООН Антонио Гутереш рече дека е „шокиран“ од цивилните жртви во Газа и „длабоко шокиран“ од израелскиот напад врз зградата во која се сместени канцелариите на меѓународните медиуми, изјави неговиот портпарол Стефан Дујарик.

Изјавата доаѓа откако Израел го нападна Појасот Газа со воздушни напади во кои загинаа 10 члена на семејство и уништи 13-катна зграда во која се наоѓаа светски медиуми како Ал Џезира и Асошиејтед Прес.

Нападот се случи во услови на ескалација на тензиите што го принудија Советот за безбедност на ООН да свика итен состанок за да одговори на судирите во Израел и Газа.

Гутереш е исто така „сериозно загрижен“ поради уривањето на зграда во градот Газа, во која се сместени канцелариите на неколку меѓународни медиумски организации и станбени станови.

Меѓу тие медиуми е и Асошиејтед прес, чиј директор Гери Пруит во денешното соопштение рече дека „е избегната страшна загуба на живот со евакуација на вработените на време“. Претходно Израел соопшти дека бил известен сопственикот на зградата со цел да се изврши евакуација на станарите.

– Генералниот секретар ги потсетува сите страни дека секој неселективен напад врз цивилни и медиумски структури го крши меѓународното право и мора да се избегне по секоја цена, се вели во изјавата на Дујарик.