Грција годишно губи 16 милијарди евра од затајување даноци

Грчката држава годишно губи до 16 милијарди евра поради неплаќање даноци, покажа истражување на компанијата „Дианеосис“.

Цитирајќи податоци од истражувањето, весникот „Катимерини“ пишува дека „прекумерното оданочување на даночните обврзници и бизнисите во последните неколку години доведе до маѓепсан круг: даночно затајување е во пораст, даноците се зголемуваат и приходите се намалуваат“.

Според податоците, како што јави дописникот на МИА од Атина, само 1,6 проценти од даночните обврзници или 120 илјади луѓе треба да платат 2,7 милијарди евра или речиси 30 проценти од вкупниот данок на приходи. Се работи за Грци чиј приход е над 42 илјади евра годишно.

Како главни причини за неплаќањето даноци се истакнуваат неефикасното функционирање на системот за наплата на даноците, прекумерните високи даноци, многуте закони, прописи и циркуларни писма.