Градоначалникот Шилегов се сретна со градоначалникот на Тирана

Скопскиот градоначалник Петре Шилегов во рамки на посетата на Тирана оствари средба со градоначалникот, Ерион Велијај.

 

На средбата, како што информира Град Скопје, било разговарано за продлабочување на соработката меѓу двата збратимени града и за разменување искуства во интерес на граѓаните.

 

- Разговаравме за продлабочување на соработката меѓу двата града и размена на искуства во однос на сличните проблеми кои ги имаат Скопје и Тирана. Сите корисни искуства и реализирани одредени проекти на Тирана може да бидат добри и корисни за граѓаните на Скопје. Верувам дека и нашите искуства од овој краток период може да бидат корисни за граѓаните на Тирана, изјавил градоначалникот Шилегов.

 

Градоначалникот Велијај истакнал дека премиерите на Албанија и Македонија отвориле ново поглавје за соработка меѓу двете држави и додал оти таа позитивна клима треба да ја искористат и главните градови на двете држави.

 

Шилегов учествува на дводневна регионална конференција, што се одржува во Тирана на тема „Градови без корупција на иднината“.