Гласовите по пошта ќе бидат одлучувачки за изборот на новиот австриски претседател

Претседателските избори во Австрија се претворија во исклучително турбулентен настан, откако по пребројувањето на гласачките ливчиња резултатот на двајцата кандидати е речиси изедначен. 

Александер ван дер Белен, независен кандидат со поддршка на Зелените сепак има три илјади гласови повеќе од кандидатот на антиисламиската и евроскептичната Слободарска партија, Норберт Хофер. На овие избори важен е секој еден глас, а одлучувачки за одредување на идниот претседател ќе бидат гласовите на граѓаните, кои гласале по пошта, а кои ќе бидат преброени до денеска вечер.  

Одѕивот на гласачите во вториот круг од претседателските избори изнесуваше 72 отсто и е повисок од првиот круг.

Во првиот круг Хофер освои 35 отсто од гласовите, а неговиот противкандидат Белен, независен кандидат со поддршка на Зелените, освои 21 проценти.

Двајцата лесно ги победија кандидатите на Социјалдемократската и на Народната партија, кои доминираат на австриската политичка сцена по Втората светска војна.

Тоа предизвика потрес меѓу владејачките социјалдемократи, па канцеларот Вернер Фајман беше принуден да поднесе оставка, а го наследи Кристијан Керн.

Претседателот на Австрија има церемонијална улога, но теоретски може да ја распушти Владата и да предизвика политичка криза во земјата. Тој исто така е врховен командант на австриските Вооружени сили.