Фајон: Сакаме фер избори во Србија, не сум сигурна дека бојкотот е најдобар пат

Претседателката на Комитетот на Европскиот парламент за стабилизација и асоцијација на Европската унија, Тања Фајон, коментирајќи го најавениот бојкот на српската опозиција, изјави дека секојпат кога некој ќе бојкотира избори се отвора легитимното прашање колку изборите се фер и демократски.

 

-Јас секогаш би поддржала да имаме здрава опозиција, да се кандидира на изборите, да се најде некое решение. Знам дека во Белград меѓу политичките партии постои одредена медијација. Се во обид да имаме чесни избори, легитимни и на крајот, граѓаните да имаат некаков нормален избор.

 

– Самиот бојкот често ми се чини дека затвора некои врати во дијалогот. Не сум сигурна дека тоа е најдобриот пат, кажа Фајон, додавајќи дека политичките партии во Србија треба сами да одлучат кој пат е најдобар за нив. Говорејќи за изборните услови, таа особено се осврна на слобода на медиумите, опишувајќи ја како основа на демократијата и човековите права.

 

-Се надевам дека властите ќе сторат сé што можат за да ја направат и подобрат ситуацијата со слободата на медиумите. Јас сум многу критична кога станува збор за новинарството и медиумите во Србија, не само во Србија, туку и на целиот Западен Балкан. Не само слобода на медиумите, од целиот изборен процес зависи колку тие се фер, слободни и легитимни , оцени Фајон.

 

На прашањето на ТВ Н1 во Брисел, зошто Србија доцни во отворањето и затворањето на поглавја, Фајон рече дека ќе ја види вистинската состојба откако ќе дојде кон крајот на октомври во Србија.

 

-Затворањето и отворањето на поглавјата е нешто што е важно. Можеби динамиката не е токму онаква како што би сакале да ја видиме. Се надевам дека до крајот Србија ќе отвори уште неколку поглавја, но она што е важно е што се прави во процесот на реформи. Знаеме дека 23 и 24 се поглавја кои се најтешки. Борбата против корупцијата и организираниот криминал и др. И јас очекувам дека ќе имаме добра соработка, кажа Фајон.