Една година од функционирањето на Домот на култура „Димитар Влахов”

Со претставата „Островот на скриеното богатство” на аматерскиот театар „Чекори“, минатата година на овој ден официјално почна да работи Домот на културата „Димитар Влахов“ во населбата Автокоманда и стана центар на културните случувања во општината Гази Баба.

Петко Костовски, задолжен за одржување на центарот, изјави дека тој е значаен за развојот на културата во општината. Домот, вели тој, постои од 1949 година кога е изграден од граѓаните на Автокоманда и Општина Гази Баба.

-По пауза од неколку декади, повторно има најразлични културни настани кои ја збогатуваат културната програма во општината, настани кои ја опфаќаат целата лепеза на културни потреби на граѓаните. Особено е значајно дека во изминатиот период Општина Гази Баба, заедно со волонтерскиот труд на членовите на театар „Чекори“, го доопремија домот со најсовремена техника и беше уреден ентериерот, рече Костовски.

Домот е изграден во 2018 година на местото на старите и руинирани бараки, преку јавно-приватно партнерство меѓу општина Гази Баба и француската компанија „Феимс“. Се простира на 543 квадратни метри, има библиотека, мултимедијална сала за културни и деловни настани со капацитет до 150 луѓе, а уредени се и помошните простории, како и просторот пред домот.

Градоначалникот Борис Георгиевски изјави дека е среќен што повторно во функција на граѓаните се врати домот „Димитар Влахов”. – Тие добиваат катче за културни настани уредено по светски стандарди. Овој простор им стои на располагање на сите кои имаат потреба. По истиот принцип ќе бидат обновени и останатите домови на културата на целата територија на општина Гази Баба, рече Георгиевски.

По повод Светскиот ден на театарот, „Чекори“ денеска премиерно ќе ја изведе претставата „Ние”.