Две жртви во судар на ловец Ф-16 и патнички авион во САД

Две лица загинаа вчера во судар меѓу мал туристички авион „Цесна“ и американски ловец Ф-16 во воздухот над Јужна Каролина, информираа американските власти, цитирани од француските медиуми.

Пилотот на ловецот успаеал да се катапултира, пред неговиот авион да се урне, прецизираа од военовоздухопловната база Шоу во Јужна Каролина, каде авионот бил стациониран.

Пилотот е однесен во базата за медицински преглед, посочија изворите.Локалните медиуми соопштија дека по несреќата тој се наоѓал во свесна состојба и можел да оди.

Сударот се случил на 18 километри северно од градот Чарлстон, преку коминике соопшти Федералната управа за авијација (FAA).

Федералната служба за истраги на сообраќајни несреќи (NTSB) информира дека загинале пилотот и патникот во едномоторната „Цесна C150“.

Авионите се судриле во близина на малиот цивилен аеродром во регионот, што на воздухопловните карти бил означен како „воена оперативна зона“.

Ова е втор инцидент со Ф-16 во САД во последните две недели. На 24 јуни при обука во државата Аризона се урна ирачки ловец, кога загина пилотот, потсетуваат француските медиуми.