Доктори од Клиниката за неврохирургија и тимот за имунизација од Здравствен дом Скопје добитници на наградата „13 Ноември“ од областа на здравството

Одборот за доделување на наградата „13 Ноември“ на Град Скопје денеска спроведе тајно гласање, а потоа претседателката на Комисијата именувана од Одборот, Вангелина Мојаноска ги соопшти добитниците за 2021 година.

Од областа на науката, добитници се: проф. д-р Денко Малески и д-р. Емил Нијами, автор, лектор и преведувач.

Од областа на образованието и воспитанието добитник е проф. д-р. Мишо Докмановиќ.

Од областа на публицистиката добитник е Слободан Петровиќ.

Од областа на културата добитници се: Ирена Колиштрковска-Настева и Лилјана Пандева, писател, поет, прозаист.

Од областа на уметноста добитник е Емилија Џипунова.

Од областа на здравствената заштита, добитници се: тим за имунизација од КОВИД-19 при Здравствениот дом – Скопје и медицински тим на доктори кои ја изведоа првата операција во Република Македонија, имплантација на вагус нерв стимулатор, кај пациент со епилепсија отпорен на лекови.

Од областа на меѓународна награда добитник е Раде Шербеџија. Од ученици и студенти добитници се: Сандра Недановска, од правни лица Институтот за македонска литература – Скопје и општинското основно училиште „Кирил и Методиј“ и село Стајковци, Општина Гази Баба.

Наградата „13 Ноември“ на Град Скопје се доделува на физички и правни лица како знак на признание на Градот Скопје за остварувања во стопанството, науката, уметноста, културата, воспитанието и образованието, здравствената и социјалната заштита, спортот и физичка култура, техничката култура, заштитата и унапредувањето на животната средина и природата, како и во други сегменти на животот, трудот и творештвото, што претставуваат посебен придонес за развојот на градот Скопје и за неговиот севкупен напредок и афирмација во Република Севена Македонија и во светот. Наградата може да се додели и на физички и правни лица од други држави кои оствариле посебен придонес за Градот. Исто така, Наградата се доделува и на ученици и студенти за творечки труд или континуирани успешни постигнувања во наставните и во воннаставните активности што претставуваат посебен придонес за напредок и афирмација на Градот Скопје.