Доделени 32 зелени знамиња за нај еко училиште за 2014/15 година

На седмиот Еко-самит во организација на Здружението за едукација, комуникација и консалтинг ОХО кој се спроведува во сите градинки, основни и средни училишта во Република Македонија денеска беа доделени наградите  кои претставуваат меѓународни сертификати за исполнување еко стандарди во работата на училиштата и градинките.

Според критериумите на конкурсот „Како да се стане еко-училиште“ за учебната 2014/2015 година наградени беа 32 апликации за зелено знаме, шест за сребрено ниво, една за бронзено ниво и две препораки за статус.

Алескандра Младеновска-Костиќ, национален кординатор за програмата еко-училиште и програмски директор од ОХО, информира дека според прашалник кој бил испратен до училиштата и градинките, за кој одговор добиле од 200 институции, досега се иницирале над 2.000 еколошки акции.

- Од еколошките акции во 2014/15 година во училиштата и градинките досега се собрани 7 милиони и 312 килограми стара хартија, 260.124 килограми пластика, еден милион и 940 литри техничка вода, а засадени се и над 25 илјади садници, истакна Младеновска-Костиќ.

Според податоците од анкетниот лист, училиштата и градинките  во однос на минатата година заштедиле вода од 12.60 проценти, заштеда на струја 2,86 отсто и заштеда на нафта 11,44 проценти.

На конкурсот, кој е дел од програмата „Интеграција на еколошката едукација во македонскиот образовен систем“,  право на пријавување имале 48 градинки, 320 основни и 100 средни училишта.