Добиток за Курбан Бајрам ќе се продава само сточниот пазар

Гостиварските локални власти решија оваа година за претстојниот муслимански празник Курбан Бајрам добиток да се продава на сточниот пазар. Продажбата на други локации е забранета и ќе биде санкционирана.

– Со цел да се зачува чистотата и да се стави ред во продажбата на курбани, Општина Гостивар во соработка со Претпријатието “Прогрес пазари”, како локација за продажба на бајрамските курбани го одреди Сточниот пазар кој се наоѓа во населба Фазанерија, наведуваат од службата за информирање.

Од локалната самоуправа нагласуваат дека сточарите и сопствениците на добиток дека локацијата може да се користи без надоместок и дека продажбата на други места е строго забранета. За да се почитува редот, општинската власт преку Комуналниот инспекторат ќе преземе соодветни мерки против прекршителите на законот за јавна чистота.

Вообичаено пред Курбан Бајрам, во Гостивар продажбата на овци, говеда и кози се вршеше на големиот градски пазар и по околните паркинзи. На неорганизирната продажба, претходно имаше поплаки поради лошата хигиена и блокирање на сообраќајот.