Десет милиони евра хуманитарна помош од ЕУ за Рохинџите

Европската Комисија денеска одобри дополнителни десет милиони евра хуманитарна помош за заедницата на Рохинџите во Мјанмар и Бангладеш.

Претходно, Комисијата ослободи 33 милиони евра за помош на внатрешно раселените лица и бегалците Рохинџи.

Овие десет милиони ќе бидат фокусирани на обезбедување квалитетна здравствена помош за над еден милиони бегалци Рохинџи во Бангладеш откако нивните услови на живеење дополнителни се влошија во последните месеци. Помошта ќе оди и за храна и заштита на Рохинџите во Мјанмар каде се зголемува насилството.

-Поддршката на ЕУ помогна да се спасат безброј животи во последните две години откако започна кризата, и не смее да сопре сега кога стотици илјади Рохинџи сметаат на хуманитарната помош за да преживеат, изјави преку соопштение еврокомесарот за управување со кризи, Јанез Ленарчич.

Со оваа дополнителна помош, „ЕУ докажува дека останува посветена“ да им помогне на Рохинџите и ветува дека ќе продолжи да им помага на бегалците и на заедниците кои ги примаат бегалците како и ранливите Рохинџи останати во Мјанмар, додаде комесарот.

Од 2017, ЕУ обезбедила над 140 милиони евра за помош на Рохинџите во Мјанмар и Бангладеш.