Црна Гора бара итна помош во здравствен персонал од земјите на ЕУ и НАТО

Црна Гора побара од Европската унија и НАТО итна помош во здравствените работници, кои ќе им помогнат во борбата против коронавирусот, бидејќи, како што рече црногорскиот министер за надворешни работи, Ѓорѓе Радуловиќ, нивниот здравствен систем е пред колапс.

Во писмо до колегите во земјите-членки на ЕУ, Радуловиќ побара, доколку се во можност, итно да испратат лекари, техничари и друг медицински персонал во Црна Гора, пишува „Побједа“ од Подгорица.

Според весникот, Владата не ја известила црногорската јавност за овој апел до Европската унија.

Поддршката се бара во рамките на Механизмот за цивилна заштита на ЕУ со цел да се стави под контрола епидемијата во Црна Гора.