ЦИА декласифицираше белешки за Ал Каеда

ЦИА вчера декласифицираше повеќе од 70 претседателски разузнавачки белешки кои се однесуваат на џихадистичката група Ал Каеда и нејзиниот поранешен водач Осама бин Ладен, 25 години по нападите на 11 септември.

Оваа објава носи „транспарентност без преседан во најчувствителното разузнавачко досие во Америка, кое ги покрива годините што претходеа и денот по еден од најтемните моменти во нашата историја“, наведе ЦИА во соопштение.

Документите „следат како се менувало сфаќањето на аналитичарите на ЦИА во поглед на Ал Каеда, како и нивните напори да ги расветлат плановите за напад на Осама бин Ладен, и покрај ретките, нејасни и нецелосни информации“, се додава во соопштението.

Една од белешките, од 10 септември 1998 година, предупредува дека Ал Каеда „би можела да сруши авион полн со експлозив врз некој американски град“.

Друга, од 4 декември 1998 година, наведува дека Осама бин Ладен „и неговите сојузници се подготвуваат за напади во Соединетите Држави, вклучувајќи и грабнување авион“.

САД на 11 септември 2001 година беа мета на четири координирани самоубиствени терористички напади што ги извршија 19 припадници на исламистичката група Ал Каеда, и во кои загинаа речиси 3.000 луѓе.

МИА