Чулев: МВР ќе ја испита автентичноста на видеото „Оро“ во Чаир

Министерот за внатрешни работи Наќе Чулев најави дека случајот „орото“ во Чаир“ ќе се испита и доколку се утврди дека се случило за време на полицискиот час ќе бидат преземени мерки за санкционирање на учесниците во истото.

Тој апелира до граѓаните да ги почитуваат владините мерки за што побрзо да се нормализира состојбата настаната поради коронавирусот.

-Намалување на бројот на заразени од коронавирусот е возможно само доколку граѓаните се дисциплинирани и ги почитуваат мерките за ограничување на движењето, носат заштитна опрема и се придржуваат кон пропишаната дистанца, напиша министерот за внатрешни работи Наќе Чулев на „Фејсбук“.

Тој истакна дека во неколку наврати напоменал оти здравјето на граѓаните е најважно и во таа насока Министерството за внатрешни работи ги презема сите неопходни мерки.

Чулев потенцира дека во континуитет ги следат социјалните мрежи, видеа и содржините кои се објавуваат и секаде каде што има основ за постапување, Министерството за внатрешни работи презема соодветни активности.

-Во оваа прилика сакам да напоменам дека во конкретниот случај со „орото“ во Чаир, доколку се утврди дека видеото е направено во период кога се на сила одлуките на Владата, односно доколку се потврди неговата автентичност, полициските службеници ќе ги преземат сите мерки со цел соодветно санкционирање на учесниците во истото, истакна Чулев.

Тој потсети дека се уште е на сила ограничувањето на движењето кое беше воведено за продолжениот викенд кој завршува денес.

-Министерството за внатрешни работи со сите свои ресурси го контролира спроведувањето на одлуките на Владата и овој пат со задоволство можам да констатирам дека полициските службеници одговорно и професионално ја вршат својата работа, а граѓаните се одговорни. И воедно ќе напоменам дека на територијата на град Скопје овој викенд Секторот за внатрешни работи од Скопје имаше распоредено вкупно 55 патроли на полициски службеници, а одлуката поврзана со ограничување на движењето со минорни исклучоци се почитува на територијата на целата држава, информира првиот човек на МВР.

Тој вели дека е неоспорен фактот за желбата на сите нас, состојбата да се нормализира што поскоро и во таа насока апелира на разумност, одговорност и строго придржување до препораките за заштита на здравјето.