Четири лица од Неготино силувале 13-годишно девојче

Јавен обвинител од Основното јавно обвинителство Кавадарци донесе Наредба за спроведување истражна постапка против четири лица за кои постои постои основано сомнение дека сториле кривично дело „силување на дете кое не наполнило 15 години“ за кое е запретена казна затвор од најмалку 10 години или доживотен затвор.

Лицата се гонат за кривично дело казниво според член 188 став 3 од Кривичниот законик, а Обвинителството, како што информира, бара замена на претходно определените мерки за претпазливост со ефективен притвор.

-Осомничените на 14.02.2025 година се договориле и со возило зеле 13-годишно девојче-жртва од Неготино со кое еден од осомничените претходно се познавал. Детето го однеле на локација надвор од неготинското село Криволак и сите имале сексуални односи со жртвата, удирајќи ја и навредувајќи ја, по што ја вратиле во Неготино, информираат од Обвинителството.

Во текот на претходната постапка осомничените беа обезбедени со мерки на претпазливост, а со поведувањето на истрагата јавниот обвинител побара од судот мерките да се заменат со ефективен притвор, особено бидејќи прибраните докази до овој момент упатуваат на сомненија за тешко кривично дело за кое е запретена казна затвор од најмалку 10 години или доживотен затвор.