Чествување на Успение на Пресвета Богородица во Крива Паланка

Со утринската Божествена литургија во храмот на манастирот „Свети Јоаким Осоговски“ со која чиноначалствуваше митрополитот Кумановско-осоговски г. Јосиф започна празнувањето на Успение на Пресвета Богородица.

На литургијата присуствуваа голем број верници кои за празникот пристигнаа од разни краеви на Македонија, некои од нив ќе отседнат и повеќе денови во преубавиот духовен амбиент на манастирот, а има и такви кои престојуваат тука повеќе од две-три недели.

Празнувањето продолжува вечерва со служење вечерна литургија во манастирот со почеток во 18 часот, а утре по повод чествувањето на Свети Јоаким Осоговски, светецот-закрилник на манастирот со утринската Божествена литургија ќе чиноначалствува владиката Јосиф, по што во дворот на манастирот ќе биде осветена вода.

Денес во старата манастирска фурна се одржува и традиционалната крводарителска акција во организација на општинската организација на Црвен крст, Крива Паланка и Институтот за трансфузиона медицина од Скопје.