Чавушоглу: Турција ја продолжува политиката на отворени граници

Турскиот министер за надворешни работи Мевљут Чавушоглу синоќа изјави дека неговата земја ќе ја продолжи својата „политика на отворени граници“ за бегалците, но не навести кога Сиријците кои, бегајќи од Алепо стигнаа до турско-сириската граница, ќе можат да влезат во Турција, пренесе Танјуг.

- Се уште ја оддржуваме оваа политика на отворени граници за оние кои бегаат пред агресијата на режимот, како и од руските напади, рече Чавушоглу по состанокот во Амстердам, пренесуваат француските медиуми.

„Веќе примивме 5.000 од нив, а уште 50.000 до 55.000 се на пат и ние не можеме таму да ги оставиме затоа што воздушните напади се во тек, а и режимските (сириски) сили со поддршка на иранските шиитски милиции ги напаѓаат овие цивили“, наведе тој.

-Во текот на последните 48 часа околу 35.000 сириски бегелци пристигнаа на границата меѓу Сирија и Турција и тие се сместени во камповите на сириската страна од границата, изјави вчера гувернерот на турскиот град Килиса, Сулејман Тапсиз.

Тој на новинарите во граничниот премин Ончупинар им изјави дека очекува доаѓање на уште 70.000 Сиријци, доколку се продолжи со руските воздушни напади и военото напредување на силите на сириската Влада, пренесоа британските медиуми.