Македонија
11. July 2015 - 14:22

Чавков: Случајот „Куманово“ е јасен, јавноста е во тек со сите случувања

Министерот за внатрешни работи Митко Чавков изјави дека не сака да навлегува во полемики ниту со СДСМ, ниту со други политички партии во врска со случајот „Куманово“. Одговарајќи на новинарски прашања по посета на граничниот премин Табановце рече дека јавноста е во тек со сите случувања за овој случај.

- Има значителен број злонамерени шпекулации со кои се сака да се девалвираат капацитетите на МВР и не само на МВР туку и на останатите институции, истакна Чавков.

Додаде дека веќе се спроведува истрага, се спроведува обвинително-судска постапка, има интензивна комуникација на меѓународно ниво за размена на докази. - Така што не гледам никаков аргумент за тие тези, рече министерот Чавков за кои смета дека се конструкции.

На прашање во врска со пишувањата дека состојбата во Македонија може да ескалира, тој потенцира дека се читаат сите извештаи и дека внимателно се следат сите состојби во државата.

Ризици и индикатори за загрозување на безбедносната состојба, потенцира Чавков, има не само во Македонија туку и во останатите делови од ЕУ и пошироко. Според него, се преземаат максимални оперативни мерки за навремено да се утврдат заканите и ризиците.

- Оперативното ниво останува подигнато со оглед на тоа што е и туристичка сезона. Мислам дека успеавме да ја одржуваме јавната безбедност на соодветно ниво, изјави Чавков.